29.10.2026 күні мектебімізде дене шынықтыру пәні мұғалімдерінің облыстық семинары аясында мазмұнды әрі тағылымды іс-шара өтті.

Семинар барысында мектебіміздің дене шынықтыру пәнінің мұғалімі Кажиков Миірім Сайлауұлы 5-сынып оқушыларымен «Қозғалмалы және эстетикалық ойындар» тақырыбында ашық сабақ өткізді. Сабақ барысында оқушылардың қимыл-қозғалыс дағдыларын дамытуға, дене белсенділігін арттыруға, ептілік пен шапшаңдықты қалыптастыруға бағытталған қызықты тапсырмалар мен ойын түрлері ұйымдастырылды. Оқушылар сабаққа белсенді қатысып, өздерінің шеберліктері мен ұйымшылдықтарын көрсете білді.

Ашық сабаққа қатысқан қонақтар сабақтың жоғары деңгейде ұйымдастырылғанын атап өтіп, мұғалімнің кәсіби шеберлігіне, қолданған әдіс-тәсілдеріне және оқушылармен жүргізген жұмысына оң бағаларын берді. Сонымен қатар өз ой-пікірлерімен бөлісіп, тәжірибе алмасу арқылы құнды ұсыныстарын жеткізді.

Осы іс-шарамен қатар мектебімізде тарих пәні бірлестігінің қалалық отырысы да ұйымдастырылды. Кездесу барысында тарих пәнінің мұғалімдері өздерінің озық педагогикалық тәжірибелерімен бөлісіп, тиімді оқыту әдістерін ортаға салды. Әріптестер арасындағы кәсіби пікір алмасу білім беру сапасын арттыруға, жаңа идеялармен бөлісуге және педагогикалық тәжірибені жетілдіруге мүмкіндік берді.

Қалалық отырыс қорытындысы бойынша мектебіміздің тарих пәні мұғалімдері өз еңбектері мен кәсіби белсенділіктерінің нәтижесінде сертификаттар мен мақтау қағаздарына ие болды.

Осындай тағылымды кездесулер мен тәжірибе алмасу алаңдары педагогтердің кәсіби дамуына жол ашып, білім беру ұйымдары арасындағы ынтымақтастықты нығайта түседі.

Әріптестерімізді жетістіктерімен құттықтаймыз! Еңбектеріңізге толағай табыс, шығармашылық шабыт, жаңа белестер мен кәсіби жетістіктер тілейміз! Білімді ұрпақ тәрбиелеу жолындағы еңбектеріңіз жемісті болсын!