Қазақстан Республикасы Ғылым және жоғары білім министрлігінің Тіл саясаты комитетінің тапсырысы бойынша «Тіл-Қазына» ұлттық ғылыми-практикалық орталығының әзірлеген компьютерлік мобильдік «Steppe Games» және «Steppe Rider» ойындарын Кейкі батыр атындағы №4 жалпы білім беретін мектебінің оқушылары ойнады.

Сонымен қатар, педагогтар мен ата-аналар арасында ойындарды тиімді интерактивтік құрал ретінде пайдалану мүмкіндігі жөнінде түсіндіру жұмыстары ұйымдастырылды.

Екі ойынның сюжеттері мен интерактивті тапсырмалары А1-В1 деңгейлері аралығындағы қазақ тілінің лексика-грамматикалық минимумына негізделген. Тіл үйренуші ойындар арқылы сөздік қорын молайтып, сөйлеу дағдысын жетілдіре алады.

«Steppe Games» қазақ тілін үйретеді және мәдени дәстүрлермен таныстырады.

Ойын білім беру мазмұнын заманауи ойын механикаларымен үйлестіріп, оқу үдерісін қызықты саяхатқа айналдырады. Осы инновациялық тәсілдің арқасында балалар қазақ тілі мен мәдениетін оңай әрі табиғи түрде меңгереді.

Ойынның ерекшелігін айқындайтын басты қырлары – тарих пен этнография, мәдени ортаға терең бойлау, ұлттық ойындар және географиялық таным.

Сонымен қатар диалогтар, сюжеттік желілер мен кейіпкерлер қазақ тілін жеңіл әрі қызықты үйренуге мүмкіндік береді.

«Steppe Games» 6 жастан асқан, тілді меңгеру деңгейі әртүрлі балаларға арналған. Қосымша Google Play және Apple App Store платформаларынан жүктелініп алынды.